(Para kay Ikatulo)
Sa pagsapit sa kabuntagon.
Dili nako malimtan nga mutan-aw sa kalangitan ug mungisi maskin nga mura kog way buot nga bata nga nabuy-an ang sapi-sapi.
Naguol samtang nalipay.
Makahinumdom ko sa imong tingog, ang masadyaon mong mga pulong nga nagsangpit sa gugma nimong matinuoron.
Dili nako makalimtan na mutan-aw sa kalangitan ug mungisi, nangandoy nga sa kapanganoran makita tika nga malipayon.
Sa akong paglakaw sa adlaw,
ang mga hangin ba na nagadaplis sakong aping, imohang mga hagki para magpahinumdom sa akoa nga anaa ka sa maayong lugar?
Ang mga ulan ba sa hapon nagasangpit sa imong kamingaw sa imong mga hinigugma?
Ang mga alibang-bang ba nga nagalupad sakong atubangan imong mga pahinumdom na anaa ka sakong tapad?
Nag-ilusyon ba ko?
Kada-adlaw, mahinumduman nako ang mga ngisi nimo, kauban sa imong mga mata nga gasidlak-sdilak.
Hangtod karon natingala ko, kung unsa jud ang pasabot adtong imong mga tutok.
Ang paghawid nimo sa akong kamot nga kanunay gahatag og kahilwasan.
Ang kamatuoran, magsulti gayud ako, gimingaw ko pag-ayo kanimo.
Karon,
Dili nako malimtan na mutan-aw sa kalangitan ug mungisi.
Magpuyo ko og taman-taman sa imong handuraw.
(Para kay Ikaduha)
Sa salumsom kaniadtong niaging berano.
Sa maraag na kalangitan, ako nagpaabot sa gabiing malakahil.
Nga makita tika ug maghatag sako'g mga pahiyom ug katawa.
Sa mga tigmo nga mahatagan nako'g mga kahulogan.
Sa tuling nimong alimpatakan nga nagtukmod sa imo pagsulti sa imong maugdang nga kasingkasing.
Nag-ila man ta nga wala gituyo ang kahigayonan, apan nagtuo ko nga kinahanglan ta magkita pagbalik. Kanunay.
Ang subang dili gatugot nga magpabilin ko sa imong mga mata, nga nakita ang gabii ka nako.
Dili man itugot sa panahon ning akong pagbati kanimo.
Apan, makahulat unta ko nimo.
Ang pangutana lang nako sa akoang kaugalingon.
Hangtud kanus-a?
Magpabilin nalang usa ko sa imong handuraw.
(Para kay Una)
Adlaw. Gabii. Udto. Hapon.
Malipayon ko, tong kita pang duha.
Giilog man tika sa kahayag sauna, hinaot unta napalipay tika.
Walay perpekto nga tawo og wala sa'y perpekto na gugma, busa gipasaylo tika sa imong mga kasal-anan og pasayloa sad ko sa akoa.
Maayuhon man ka nga ulitawo, apan naghinaot ko sa imong kabag-ohan.
Ang mga rosas naay tunok og kani makasamad, sakit og mupali.
Paga-ampingi ang usa. Ang usa na naghatag og dili gakamatay na pagbati.
Nagpasalamat ko sa imong gugma.
Sa tanan.
Sa kalipay taman sa kasakit.
Sa tanan mga kanta nga atong nakanta.
Sa mga hangin nga atong natagbuan.
Sa mga adlaw og gabii nga atong nasalo.
Wala ko nagmahay nga mahigugma nimo, para masayod ka.
Og hangtud sa hangtud.
Itago nako ang imong handuraw.
(Ang katapusang Pamaalam)
Sakit man sa'kong buot, kinahanglan na gayud tingali ko mamaalam sa mga damgo na usa ka adlaw, mubalik ang imong mga pahiyom.
Mubalik ka usa kaadlaw og mabati nako pagbalik ang init nimong gugma.
Mamaalam nako.
Kinahanglan na nako buhian ang alibang-bang padulong sa kahayag.
Kinahanglan na nako tika ipaubaya sa Amahan.
Nalipay ko sa imong desisyon.
Nalipay ko kay gipili nimo ang sakto.
Dili nako angay manghilabot pa kay kabalo ko na nalipay sad ka.
Mamaalam usa ko taman sa atong sunod na pagkita.
Makapahiyom kog nakadungog na nakita na nimo ang para sa imo.
Ayaw na kana siya buhia, ang rosas na imong gikabtan.
Magpadayon kog lakaw sa akoang kinabuhi.
Dili malimtan.
Ang handuraw
Sa kabuntagon.
Sa salumsom.
Sa adlaw, gabii, udto og hapon
