Ngano Apan Salamat, Amigo

Unya, kalit lang na milakaw ka

Na wa'y lingi-lingi

Maskin man lang bahinan mi

Sa dyuta'y nimong pahiyom

Midagan ka'g ahat

Gibayaan ang imong mga buhat

Unsa kaha'y naa sa imong utok?

Na kaniadtong isang adlaw

Ganahan mualingkawas sa imong mga tutok

Gibuhian nalang unta nimo, bai!

Sige lang gud kung sayang ilabay.

Apan wala unta ka milakat

Nga kami mangakurat

Kay maglibog mi

Asa isibog ang mga kinakusgang panahon

Sa gisapot na pagkamasul-ubon

Ang mga katawa, asa man namo ibuwagdya

Kung kaning mga luha

Muawas na labaw pa sa gitagna

Nga adlaw na manggitapok usab ta

Ipang-alsa namo ang among bukton

Dili na alang ika'y sugaton

Kung dili, alang gunitan

Ang nahabilin na dalan nga sauna atong giagian

Hinaot unta magkita ta'g balik, bai.

Salamat sa paglabay.

Wa'y Ayo, Di Mada

Naa nasad ka gapakita.

Sa likod asa akong utok perminte ka.

Asa man tawon tika makit-an?

Amawa, wa paman diay tika nailhan.

Gibalakan ko sa huni sa hangin.

Tua ra man daw ka sa lain.

Huwaton ra daw nako nga kamo magbulag.

O di kaha mubalik ang imong kalag.

Tua ra man daw ka dadto gahulat.

Nah! Mao sad akong gibuhat.

Gasige daw pud ka'g pangita nako.

Naunsa! Wala man unta ko nagtago.

Wala man jud ko nagdali.

Apan nganong sige ko'g lingi-lingi?

Dili ko kasabot sa akong gibati.

Sa palibot akong lawas sigeg pamati.

Luokon nalang kaha ko sa panahon?

O sa kamatuoran duklongon?

Kaha naa na daw kuno ko'y nabuy-an.

Kay ang mga kahigayunan gasige nako'g panid-an.

Mirisi daw, kung inana. 

Ay! Way nada, luoy biya.

"Naunsa Naman na nga Bestida?"

Dili na sala

ni mama ug papa,

kung mahugawan ang akong bestidang,

puti, putli.

Kay sauna pa,

wala sila nagkulang og pamadlong

ug ingon

na bantayan kini dili makusnot

dili mahugawan

ug madiretso,

uban sa mga bulingon.

Dili sad sala,

ni Ondoy ug ni Dodong,

na sama sa mga bata

ganahan ra makigdula.

Adtuon ang kamingawan,

Mangaligo sa ulan.

O di kaha ambakan

ang taas na kalayo sa halinganan.

Diha-dihang,

nagisian ang akong bestidang

puti, putli.

Dili sad sala

sa akong mga maguwang,

kung ang akong bestida

mabuling kay ako natuwang,

tungod sa akong kaboang.

Unya, sa akong kadanghagan,

miawat ko sa ilang binuhatan

na mugamit og chlorine

aron mawagtang ang buling.

Sa dihang, nagkabuho-buho

man hinuon kini,

puno gihapon

sa lapok, sa abog.

Dili sala sa panahon,

kung makalimtan nako labhan

ang akong bestida

tungod sa akong pagkatapulan

o kay nahingag ko'g dula'g dagan-dagan,

katsoy ang kamatuoran.

Labi na dili sala sa Ginoo,

na tua sa kalangitan

kung iya 'kong bungolan

tungod ang iyang mga tawag

gasige nako'g balibaran.

Paulion.

Aron hugasan ang akong bestida.

Apan gipugos nako na,

dili Siya pansinon.

Karon,

ang akong bestida,

daghan na'g gisi

dili na mauli

ang iyang kaputi,

ang iyang kaputli.

Dili na mabalik ang tanan.

Kung magsugod balik sa sinugdanan,

maningkamot kaha ko aron sa kabag-ohan?

Karon,

ako'y gisayangan

sa akong bestidang

sauna nga puti, putli.

Apan ako naming ampingan

na ang daang buslot ug gisi

dili na musamot og ngisi.

Kanunay ko naning labhan

Maskin dili na makaplagan

ang iyang kaputi, kaputli.

Ug sul-ubon gihapon ni nako

hangtod sa magkita nami

sa atong Ginoo

Pasimple

Pagpangamusta sa akong mga iyaan,

ako ilang giingan,

"Day, pagpakabong usa sa imong pagkadalaga."

Mitando ko ug midungo sa pagtuo.

Hangtud ang among istorya miabot bahin sa kwarta.

Gipangutana ko nila kung ako naa ba'y natigum na pipila.

Mitubag ko nila, "Wala mga tiya."

Nakurat sila, ug samtang miaksyon pa sila'g kabalaka,

gisumpayan na nako sila'g komedya,

"kay sa akong pagkadalaga, ako magpakabong usa."

Ang ilang mga dagway dili mahitsura.

Misiga pag-ayo ang ilang mga mata

Wala nako napugngan ang akong katawa.

Ug nananghid ko na mulakaw na,

"Ako usang atimanon,

ang yutang gipalit nako kagahapon."

Pangbikil

Gimino man tali

ang mga ginoo,

padung sa pangpang.

Unya, miambak sa dagat

sa wa'y hunong

na pangandoy

sa panit ug kainit.

Bitbit ang gugmang

gikalimtan nalang.

Nagtuo na sila

nga maayo kini,

ibutang sa bulsa.

Mao man sad daw

ang kahigal sa ilang

mga nimpa.

Sakay sa ilang kauwag,

gipangpiyong ang mga mata

aron dili matagbuan ang

tunok

na makapali sa kasingkasing.

Naghikog sa kahayag

na gisaad sa kabuntagon.

Nagpakalumos sa kahayahay

na wa'y tumong.

Sama sa,

pagpaningkamot pagpakabuhi

padung sa kamatayon.

Aron maskin kaisa lang,

makabati'g kapuslanan

na human na ang tanan.

Kay tawo ra,

tawo ra sa taman-taman.

Dialogo sa Duha ka Adik

Kalami ba ibuhat

og daotan karon.

Mupisil'g himaya'g

hinog na gata supsupon.

Unsaon man nimo'g himo

anang imong gipanamgo?

Kung dili ka mumata,

na wala diri karon imong gipangita!

Ay, nakaminus ang giatay!

Bantay lang jud,

kung kani matinuod.

Masuya nalang ang maglaway.

Aw, maglaway?

Wala jud  na sa akong linya.

Kinahanglan man ta magtarong og pangita.

Ipagsiga'g ayo ang mga mata.

(katawa) Karon pa lage ko ana.

kay sa akong nahibaw-an.

Ang himaya makab-ot,

sa piyong na mga mata!

Ang tinuod na kahayag tua sa kangit-ngit.

Wala'y sanina.

(mihilom)

Sige, tawo na kung tawo.

Unsa diay ang imong gipangita.

Wala man tali ka naminaw.

Ang wala karon!

Ikaw pa gali ang miingon!

Unya, unsa manang sa imong siga na mata

nangandoy na makita?

Ang akong gipangita,

maghatag og pitik sa kasingkasing,

magdungag og kasidlak sa adlaw

sa akong alimpatakan na wa'y hanaw.

Maghatag og alamag na gabanaw

sa walay hunong na pag-atiman sa akong kalag.

Makaya dayon nako'g lakaw sa kinabuhi taman-taman.

Yati ra!

Dawbeh, kana imong gipangita,

Panigurado wa'y hitsura!

Unsaon ko manang hitsura,

Kung dili lalom ang huna-huna?

Unsaon ko manang huna-huna?

Kung sa katre wa'y ikabuga?

Nah! di ta makabalo,

Kana sila maayo diay mususi og kinatawo!

Mao ba?

Kung inana, muapil ko'g pangita!

Nahinaykan (Practice Poem #1)

Angay pa ba lalisan,

ang angay na undangan?

Dili man jud mahimo,

na kadto mahitabo

kay una sa tanan...

RESULTA RANA SA IMONG PAGKAKIATAN.

Nangaway lagi ka na wa sa lugar?

Wala man unta ko nangilog og Nutri-star.

Maskin na paborito nako to,

kay lami pag-ayo.

GIBAYAAN KO NAMAN NA SYA NA BISYO.

Hala sige!

Padayon anang imong gibati!

Gasige man tali kag um-um og itlog

(pakapinan sad nato'g hotdog)

Naunsa! Gasige raman buto ng imong butsi.

ug ang imong mga storya intawon makaliki!

Mura man ka'g si'g kinsa,

dyosa? jara!

Makapanangkon og tawo

na dili man jud (sa pag-anak pa nya),

IMO!

Mata na, Inday!

Kay imong utok gabitay!

Kauban sa mga tae sa imong lubot!

Ug sa imong otot,

Na sama nimo sigeg bagutbot.

Panghilabot!

Gapanimaho na ang pagka way buot.

Bow.

Disclaimer: Una sa tanan, kung panganlan kag inday o imo na syang angga...dili ikaw na ha? (Practice lang to) :-D